పిచ్చి జనాలు…
పిచ్చి జనాలు,
మందలో మేకలు,
బుర్ర ఉన్నా, లేకున్నా,
తేడా లేని మహా మేధావులు!
అన్యాయం, అన్యాయం,
అంటూ ఆక్రోశిస్తూ,
న్యాయమేమిటో తెలీని,
న్యాయమూర్తులు ఈ పిచ్చి జనాలు!
మోసపోతూ,
మళ్ళి మళ్లీ మోసపోతూ,
మోసానికి అలవాటైపోతూ,
అలవాట్ల పొరపాట్లకు,
నవ్వాలో, ఏడవాలో కూడా తెలీని,
ఘరానా మోసకారులు ఈ పిచ్చి జనాలు!
నేటి న్యూస్ పేపర్ చదువుతూ,
ఆవేశం తెచ్చుకుని,
రేపటికల్లా మర్చిపోయే,
మహా ఞాపకస్తులు ఈ పిచ్చి జనాలు!
లంచాలు ఇస్తూ,
పనులు చేపించుకుంటూ,
అధికారులు లంచగొండులు అంటూ,
వాపోయే నీతిమంతులు ఈ పిచ్చి జనాలు!
“అన్నీకావాలంటూ” సమ్మెలు చేస్తూ,
బస్సులు తగలేస్తూ,
బడులు,షాపులు మూసేస్తూ,
కాలాన్ని కాల్చేస్తూ,
“ఏమేమి కావాలో చెప్పు” అంటే,
నాయకుల కాళ్ళు, కళ్ళు చూసే,
సమ్మేకారులు ఈ పిచ్చి జనాలు!
ఐదేల్లకొకసారి నేరగాడిపై,
తుపాకీ పేల్చే అధికారమున్నా,
తుపాకీ గుండును,
నేరగాడి జేబులో పెట్టి,
ఎదురుకాల్పుల్లో ఎన్కౌంటర్ అయ్యే,
దయగల సహృదయులు ఈ పిచ్చి జనాలు!
సూటుబూటు వేసుకుని,
సాఫ్ట్వేర్ ఆఫీసులో కూర్చుని,
ప్రోగ్రామ్స్ ఎడాపెడా రాసేసే వీరులు,
ఓటు వెయ్యటానికి కూడా తీరిక లేని,
బిజీకారులు ఈ పిచ్చి జనాలు!
భాద్యత, హక్కులకు తేడా తెలీని,
సగటు జనాలు ఈ పిచ్చి జనాలు!
ఈ పిచ్చి రాతలు రాస్తున్న నేను,
ఈ పిచ్చి జనాల పిచ్చికి,
ప్రతీకను!!
మీకీ పిచ్చి గోల నచ్చకపోతే ఇక్కడ క్లిక్ చెయ్యకండి……నన్ను “ఈ పిచ్చి గోల ఏంటమ్మా”,అని తిట్టకండి… సమాజంలో సామాన్య మానవుడు
10 Responses to పిచ్చి జనాలు…..
సురేష్ says: 
