తూతూ మంత్రం

తూతూ మంత్రం
- సంపాదకీయం

పార్లమెంటు బడ్జెట్ సమావేశాలు ఇన్ని తక్కువ రోజులు జరగడం ఇటీవలి కాలం లో ఎప్పుడూ లేదు. గడచిన శీతాకాలపు సమావేశాల మాదిరిగా పూర్తిస్థాయి సభాస్తంభనలు జరగలేదు కానీ, ఈ సమావేశాలు కూడా సజావుగా సాగాయని చెప్పలేము.

సభలో ప్రవేశపెట్టవలసిన బిల్లుల్లో అత్యధికం పెండింగ్‌లో పడిపోయా యి. పన్నెండున్నర లక్షల కోట్ల వ్యయాన్ని ప్రతిపాదించిన భారీ బడ్జెట్‌ను ప్రజాప్రతినిధులు నిశిత పరిశీలన చేయకుండానే ఆమోదించవలసి వచ్చింది. అయితేనేమి, రైల్వే బడ్జెట్‌ను, కేంద్ర బడ్జెట్‌ను ప్రభుత్వం ఆమోదింపజేసుకోగలిగింది. ఐదు రాష్ట్రా ల్లో త్వరలో జరగనున్న ఎన్నికల దృష్ట్యా, ప్రతిపక్షాలు అవసరమైన రాజకీయ ప్రచారాన్ని పొందగలిగాయి.

బడ్జెట్ సమావేశాల మధ్యలో కొద్దిరోజులు విరామం ఇచ్చి మరో విడత సమావేశా లు నిర్వహించడం ఆనవాయితీ. ఏప్రిల్ నెలలో ఐదు రాష్ట్రాల్లో అసెంబ్లీ ఎన్నికలు జరగనున్న దృష్ట్యా, మలివిడతను విరమించుకున్నారు. మార్చి 25 వరకే సమావేశాల ను కుదించారు. ఫిబ్రవరి21న ప్రారంభమైన బడ్జెట్ సెషన్స్‌లో పార్లమెంటు మొత్తం 23సార్లు సమావేశమైంది.

శీతాకాల సమావేశాల స్తంభనకు కారణమైన సంయుక్త పార్లమెంటరీ సంఘం ఏర్పాటుకు ప్రభుత్వం ఈసారి అంగీకరించింది. అయినాసరే, సమావేశాలు సజావుగా సాగలేదు. తెలంగాణ ఎంపీలు వరుసగా సభలో చేసిన ఆందోళన, సెంట్రల్ విజిలెన్స్ కమిషనర్ నియామకంపై సుప్రీంకోర్టు తీర్పు, వికీలీక్స్ ద్వారా వెల్లడయిన 'ఓటుకు నోటు'-పార్లమెంటును కుదిపివేశాయి. టిఆర్ఎస్ సభ్యు లు ఇద్దరు లోక్‌సభలో తెలిపిన నిరసన, మొదటిరోజు నుంచి కాంగ్రెస్ తెలంగాణ ఎంపీలు చేసిన నినాదాలు, వారికి భారతీయజనతాపార్టీ నాయకత్వం తెలిపిన మద్ద తు- సభా కార్యక్రమాల్లో చెప్పుకోదగ్గ విశేషాలు.

2జి స్పెక్ట్రమ్ కుంభకోణంతో ప్రతిష్ఠ దిగజారిన యుపిఎ ప్రభుత్వం, విజిలెన్స్ కమిషనర్ థామస్ నియామకంపై సుప్రీంకోర్టు వేసిన అక్షింతల కారణంగా మరోసారి బోనెక్కవలసి వచ్చింది. జరిగినదానికి తాను బాధ్యత వహించడం ద్వారా ప్రభుత్వాన్ని సంకట స్థితినుంచి గట్టెక్కించాలనుకున్న ప్రధాని ప్రతిపక్షం నుంచి తీవ్రమైన విమర్శలు ఎదుర్కొన్నారు. తెలిసితెలిసీ చేసిన నియామకం అది. ఇతరులు హెచ్చరించినా ఖాతరు చేయక థామస్‌కు ప్రధాని ఆ పదవిని అందించారు.

యుపిఎ ప్రభుత్వాన్ని అప్రదిష్ట నుంచి రక్షించడానికి ఇక మన్మోహన్ సింగ్ దగ్గర మిగిలిన ప్రతిష్ఠ ఏమీ ఉన్నట్టు లేదు. 2008లో అణుఒప్పం దం వివాదం నేపథ్యంలో యుపిఎ-1 ప్రభుత్వాన్ని గట్టెక్కించడానికి కోట్లు వెచ్చించి ఓట్లు కొన్నారని వికీలీక్స్ ద్వారా వెల్లడయిన సమాచారం ప్రభుత్వాన్ని, ప్రధానిని మరీ ఇరకాటంలో పెట్టింది. వికీలీక్స్ సమాచారాన్ని నమ్మనక్కరలేదని, విదేశీయులు చెప్పినదాన్ని ప్రమాణంగా తీసుకోనక్కరలేదని-ఏవేవో సమర్థనలు చెప్పారు.

కానీ, ప్రజలలో ఏర్పడవలసిన అపనమ్మకం ఏర్పడిపోయింది. దేశసార్వభౌమాధికారాన్ని పణం పెట్టి అణు ఒప్పందం కుదుర్చుకుంటున్నారని ఒకపక్కన ప్రతిపక్షాలు ఆరోపిస్తున్న సమయంలో, అవసరమైన మద్దతును అవినీతిమార్గాల ద్వారా సమకూర్చుకోవడం ద్రోహపూరితమని అర్థం చేసుకోవడానికి పెద్ద రాజకీయజ్ఞానం అక్కరలేదు. నీతిపరుడిగా కీర్తిగడించిన ప్రధానికి తెలియకుండానే ఇవన్నీ జరుగుతాయని నమ్మడానికి వీలులేని సందర్భాలు ఇవి.

శీతాకాల సమావేశాల సందర్భంగా ఏర్పడిన ప్రతిష్టంభనను చూసి, ఎప్పటికైనా ఈ పార్లమెంటు సక్రమంగా సాగుతుందా, మధ్యంతర ఎన్నికలు రాక తప్పదా అన్న అనుమానాలు కలిగాయి. జెపిసి విషయంలో కేంద్రం సుముఖంగా మారడంతో బడ్జె ట్ సమావేశాలు అర్థవంతంగా సాగుతాయన్న ఆశ మొదట కనిపించింది. ప్రధాన ప్రతిపక్షమైన బిజెపి కూడా ఈసారి సభా కార్యక్రమాలను సాధ్యమైనంతగా అనుమతించాలనే భావించింది.

ఆనవాయితీగా జరగవలసిన తప్పనిసరి ఆమోదాలను, చర్చలను అనుమతిస్తూనే, ప్రతిపక్షాలన్నీ ప్రభుత్వాన్ని ఎండగట్టే ప్రయత్నంలో సఫ లం అయ్యాయి. సంచలనాత్మకమైనవీ, రాజకీయంగా తక్షణం లాభదాయకమైనవీ అయిన అంశాలు ప్రాధాన్యం పొంది, సాధారణమైనవీ, దీర్ఘకాలంగా పెండింగ్‌లో ఉన్నవీ అయిన అంశాలు అప్రధానమై అన్యాయమైపోవడం- ఈసారి సమావేశాల్లో నూ కనిపిస్తుంది.

మొత్తం ఈసారి 37 బిల్లులు ప్రవేశపెడదామనుకున్నారు. వాటిలో మహిళారిజర్వేషన్ల బిల్లు, భూసేకరణ సవరణబిల్లుతో సహా అత్యధికం పెండింగ్‌లోనే ఉండిపోయాయి. పెన్షన్ రెగ్యులేటరీ అథారిటీ బిల్లు వంటి ఒకటి రెండు మాత్ర మే సభ ఆమోదాన్ని పొందాయి. బడ్జెట్‌లో వివిధ పద్దుల కింద చేసిన కేటాయింపులను మదింపు వేసి, చర్చించడానికి సమయమే దొరకలేదు.

అసెంబ్లీ ఎన్నికల పేరు తో పార్లమెంటరీ స్థాయిసంఘాలు మంత్రిత్వ శాఖల వారీగా చేయవలసిన కేటాయింపుల సమీక్షలను రద్దు చేశారు. ఇక సమావేశాల సందర్భంగా పార్లమెంటు సమీపంలోను, రాజధానిలోనూ వివిధ ప్రజాసమస్యలపై జరిగే ఆందోళనలకు, ప్రదర్శనలకు సభలో పెద్దగా సంఘీభావం లభించలేదు. ఎస్సీ రిజర్వేషన్ల వర్గీకరణపై ఢిల్లీదాకా వెళ్లిన మాదిగ పోరాటకారులను ఆలకించేవారే లేకపోయారు.

అయితే, నిత్యరణరంగంగా ఉండిన పార్లమెంటు సమావేశాలు, ఒకరకంగా దేశంలో ప్రస్తుతం నెలకొన్న పరిస్థితిని ప్రతిబింబించాయి. సర్వత్రా వ్యాపించిన ఆర్థిక అకృత్యాలు, అవినీతి, నైతికమైన డొల్లతనం దేశనాయకత్వాన్ని హీనస్థాయిలో నిలుపుతున్నాయి. పాలకపక్షాన్ని నిలదీయడమే తప్ప స్వయంగా ప్రత్యామ్నాయం కాలేని బలహీనతలో ప్రతిపక్షం కూరుకుపోయి ఉంది. కాంగ్రెస్‌పార్టీ స్వయంగా అంతర్గత జాడ్యాలతో ఉక్కిరిబిక్కిరిగా ఉన్నది.

2జి స్కామ్‌లో ప్రధాన దోషిగా ఉన్న పార్టీని బెదిరించి నాలుగుసీట్లు ఎక్కువ సంపాదించుకోవడం తప్ప, దాన్ని దూరం పెట్టగలి గే శక్తి కాంగ్రెస్‌కు లేకపోయింది. ఆంధ్రప్రదేశ్‌లో రాష్ట్రవిభజన సమస్య పార్టీనే రెండు గా చీల్చింది. శ్రీకృష్ణ కమిటీ ద్వారా సంపాదించిన ఏడాది గడువు తరువాత కూడా ఎక్కడ వేసిన గొంగడి అక్కడే చందంగా సమస్య మిగిలిపోయింది. వైఎస్ హయాం లో అధిష్ఠానం అనుసరించిన వైఖరి కారణంగా జగన్ ఏకు మేకై కూర్చున్నాడు. వీటన్నిటి నేపథ్యంలో కాంగ్రెస్ చొరవను కోల్పోయి, తానే వేసుకున్న చిక్కుముడులను విప్పలేక సతమతమవుతున్నది.andhra jyothi soujanyamutho

గ్రామాల్లోనూ సభలు నిర్వహిస్తే సమస్యలు పరిష్కారం : మాణిక్యవరప్రసాద్

హైదరాబాద్, మార్చి 26 : అసెంబ్లీ సమావేశాలు ఆరునెలలు హైదరాబాద్‌లోనూ, మరో ఆరునె లలు గ్రామీణ ప్రాంతాల్లోను నిర్వహించాలని మంత్రి డొక్కా మాణిక్యవరప్రసాద్ తన సరికొత్త ఆలోచనలతో ముందుకువచ్చారు. దీని ద్వారా గ్రామీణ ప్రాంతాల్లోని ప్రజల సమస్యలను త్వరగా పరిష్కరించవచ్చనని ఆయన ఆశాభావం వ్యక్తం చేశారు.

ఈసందర్భంగా శనివారం అసెంబ్లీ మీడియా పాయింట్ వద్ద ఆయన మాట్లాడుతూ ఒకసారి తెలంగాణలోని మారుమూల పల్లెల్లో నిర్వహిస్తే, మరోసారి ఆంధ్రా ప్రాంతంలోని ఓ గ్రామంలో, ఇంకోసారి రాయలసీమలోని ఇలా సభలు నిర్వహించి ప్రజా సమస్యలను పరిష్కరిస్తే బాగుంటదనే తన అభిప్రాయాన్ని వెలిబుచ్చారు.

దీనిపై ముఖ్యమంత్రి కిరణ్‌కుమార్‌రెడ్డితో చర్చిస్తామని, ప్రతిపక్షానికి , ప్రభుత్వానికి లేఖ రాస్తానని మంత్రి పేర్కొన్నారు. సభ నిర్వహణకి పెద్ద భవనాలే అవసరం లేదని, టెంట్ల కింద కూడా నిర్వహించవచ్చని అన్నారు. స్పీకర్, ఎమ్మెల్యేలు, మంత్రులు ఆయా గ్రామాలకు చేరుకుని ప్రజా సమస్యలను స్వయంగా అడిగి త్వరగా పరిష్కరించ వచ్చని మాణిక్యవరప్రసాద్ అభిప్రాయ పడ్డారు.

విద్యాబిల్లు ఆమోదం పొందకపోవడంపై కపిల్‌ సిబల్‌ అసంతృప్తి

న్యూఢిల్లీ : విద్యా హక్కు చట్టం పరిధిలో అంగవైకల్యం కలిగిన పిల్లలను అననుకూల బృందాలుగా పరిగణించాలని పేర్కొంటూ ప్రవేశ పెట్టిన బిల్లును శుక్రవారం రాజ్యసభ ఆమోదం పొందక పోవడంతో మానవ హక్కుల శాఖమంత్రి కపిల్‌ సిబల్‌ నిరుత్సాహానికి గురైనట్లు కనిపిస్తున్నది. పిల్లలకు సంబంధించిన ఉచిత, నిర్బంధ విద్యాహక్కు(సవరణ) 2010 బిల్లు శుక్రవారం చర్చించాల్సిన అంశాల జాబితాలో ఉన్నందున కపిల్‌ సిబల్‌ దానికి సిద్ధమై వచ్చారు. అయితే సభ ప్రారంభం కావడానికి కొన్ని నిముషాల ముందు ఈ బిల్లును సభలో చర్చించడం లేదని తెలుసుకున్న సిబాల్‌ నిరుత్సాహానికి గురయ్యారు. కాగా బిల్లు ఆమోదానికి సంబంధించి వామపక్ష సభ్యులు అనుకూలంగా ఉన్నప్పటికీ దీనిపై చర్చించడానికి తగినంత సమయం కావాలని బిజెపి కోరింది. ఈ బిల్లుపై కనీసం నాలుగు గంటలపాటు చర్చ జరగాలని బిజెపి పేర్కొంది. ఆ తరువాత ఈ విషయమై బృందాకారత్‌ విలేకరులతో మాట్లాడుతూ కాంగ్రెస్‌, బిజెపిలను తీవ్రంగా విమర్శించారు. ప్రభుత్వ నిర్వాహకులు, బిజెపి మొండితనం వలన బిల్లు ఆమోదం పొందలేకపోయిందని ఆమె అన్నారు. ఈ బిల్లు ఆమోదం పొందేందుకు పార్లమెంటరీ వ్యవహారాల మంత్రి పి.కె. బన్సాల్‌ సరైన ప్రయత్నం చేయలేదన్నారు. పెన్షన్‌ బిల్లును ప్రవేశపెట్టడానికి ప్రభుత్వానికి సహకరించిన బిజెపి ఈ విద్యా బిల్లు ఆమోదం పొందడంలో సహకరించలేదన్నారు.

చట్టాన్ని అమలు పరచేందుకు 15 ఏళ్ళు చాలదా: సుప్రీం కోర్టు

కార్మికలోకం

వి.వి.ఎస్‌.మూర్తి

భవన తదితర నిర్మాణ కార్మికుల ఉపాధి క్రమ బద్ధీకరణ చట్టాలను అమలు పరచడంలో రాష్ట్ర, కేంద్రపాలిత ప్రాంతాల ప్రభుత్వాలవైఫల్యాల పట్ల తన ఆందోళనను వ్యక్తం చేస్తూ సుప్రీం కోర్టు మార్చి 15న సంబంధిత అధికారులకు నోటీసులు పంపించింది. వారికి వ్యతిరేకంగా కోర్టు ధిక్కార ప్రొసీడింగ్స్‌ ఎందుకు చేపట్టకూడదో తెలియజేయమని కోరింది.
ప్రధాన న్యాయమూర్తి ఎస్‌హెచ్‌ కపాడియా నేతృత్వంలోని సుప్రీం కోర్టు ధర్మాసనం ఆ అధికారులను తదుపరి విచారణ రోజున కోర్టుకు వ్యక్తిగతంగా హాజరై, చట్టాన్ని అమలు జరపడంలో వారి వైఫల్యాలకు గల కారణాలను వివరించుకోవాలని తెలియజేసింది.
సుప్రీం కోర్టు- ఉత్తర ప్రదేశ్‌, జమ్మూ-కాశ్మీర్‌, అస్సాం తదితర రాష్ట్రాల కేసును ప్రస్తావిస్తోంది. అక్కడి ప్రభుత్వాలు భవన తదితర నిర్మాణ కార్మికుల (ఉపాధి క్రమబద్దీకరణ, సర్వీసు నిబంధనల) చట్టం, 1996ను అమలు జరపడంలో విఫలమయ్యాయి.
అలాంటి పరిస్థితుల్లో రాష్ట్ర ప్రభుత్వ అధికారులకు కోర్టు ధిక్కారణ కింద ఎందుకు చర్య తీసుకో కూడ కారణం చూపమని కోరుతూ వారికి నోటీసులు పం పించడం తప్ప కోర్టు ముందు మరో మార్గం లేదని తేల్చిచెప్పింది.
దేశ సర్వోన్నతన్యాయస్థానం పైన పేర్కొన్న చట్టం అమలుకు సంబంధించి జారీ చేసిన వివిధ ఆదేశాలను రాష్ట్ర ప్రభుత్వాలు నిర్లక్ష్యం చేశాయని, వారి చట్టబద్ధమైన విధులను నెరవేర్చడంలో విఫలమైనాయని పేర్కొంది.
భవన, నిర్మాణ కార్మికుల చట్టాన్ని అమలు పర చేందుకు రాష్ట్ర ప్రభుత్వాలకు ఆదేశాలివ్వాలని కోరుతూ కోర్టులో దాఖలైన ప్రజాప్రయోజనాల వాజ్యం (పిఐఎల్‌-పిల్‌) పై విచారణ జరుగుతోంది.
ఈ ఫిర్యాదును ఎన్‌జివో నిర్మాణ కార్మికుల జాతీయ ప్రచారోద్యమ కమిటీ ఫైల్‌ చేసింది. మహారాష్ట్ర, గోవా నాగాలాండ్‌, ఛత్తీస్‌ఘర్‌తో సహా అనేక రాష్ట్రాలు చట్టాన్ని అమలు పరచడంలో విఫలమయ్యాయని ఆరోపిస్తోంది. ఈ చట్టం అసంఘటిత నిర్మాణ కార్మికులను క్రమబద్ధీక రించేందుకు ఉద్దేశించబడింది.
ఈ చట్ట ప్రకారం ఆయా ప్రభుత్వాలు రిజిస్టరింగ్‌ అధికారులను నియమించాలి, ప్రతి యజమాని తమ సంస్థను రిజిస్టర్‌ చేయాల్సి ఉంది.
ఈ చట్ట ప్రకారం నిర్మాణ కార్మికులకు వివిధ ప్రయోజనాలు సమకూర్చాలి. కార్మికులు ఈ ప్రయోజ నాలను పొందేందుకు ప్రతీ రాష్ట్రం, రాష్ట్ర సంక్షేమ బోర్డును ఏర్పాటు చేయాల్సి ఉంది.
ఈ బోర్డుకు చైర్మన్‌గా కేంద్ర ప్రభుత్వం నామినేట్‌ చేసిన వ్యక్తి ఉండగా, ఇతర సభ్యులుగా 15 మందికి మించకుండా రాష్ట్ర ప్రభు త్వం నియమించాల్సి ఉంది.
చట్ట ప్రకారం, సంక్షేమ బోర్డుల నేర్పాటు చేసేందుకు రాష్ట్ర ప్రభుత్వాలకు ఆదేశాలిచ్చేందుకు అధికారం కలిగిన కేంద్ర ప్రభుత్వం తన అధికారాన్ని వినియోగించుకోక పోవడం పట్ల సర్వోన్నతన్యాయస్థానం ఆందోళనను వ్యక్తం చేసింది. ఇది సెస్‌ద్వారా వసూలు చేసిన మొత్తాన్ని కార్మిక ప్రయోజనాల కోసం వెచ్చించేందుకు అవ రోధంగా ఉందని కోర్టు పేర్కొంది. భవన తదితర నిర్మాణ కార్మికుల చట్టంలోని సెక్షన్‌ 60 కింద రాష్ట్రాలు బోర్డులనేర్పాటు చేయడంపై ప్రాథమిక చర్యలు కూడా కేంద్రం తీసుకోలేదని ఇంతకుముందు జరిగిన కేస్‌ హియరింగ్‌లలో (విచారణలలో) కోర్టు వ్యాఖ్యానించింది.
ఎన్‌జివోకు పిటీషనర్‌గా హాజరౌతున్న సీనియర్‌ అడ్వకేట్‌ కాలిన్‌ గొంజాల్వెజ్‌ తమిళనాడు, కేరళలు తప్ప ఇతర రాష్ట్రాలన్నీ చట్టాలను అమలు జరపడంలో విఫలమయ్యాయని చెబుతున్నారు.
చట్టాలు చేసి 15 ఏళ్ళు గడుస్తున్నా, ఇటు కేంద్రం గాని, అటు రాష్ట్ర ప్రభుత్వాలుగాని, వాటిని అమలు జరిపిన దాఖలాలు లేవని పిఐఎల్‌ ఆరోపిస్తోంది.

సమాచార కమిషన్‌లో

సమాచార కమిషన్‌లో అదనపు కమిషనర్లను నియమించాలి

Thu, 24 Mar 2011, IST    vv Share  Buzz up!

కిరణ్‌కుమార్‌కు నారాయణ లేఖ

హైదరాబాద్‌ : ఆంధ్రప్రదేశ్‌ సమాచార కమిషన్‌లో అదనంగా కమిషనర్లను నియమించాలని ముఖ్యమంత్రి కిరణ్‌కుమార్‌ రెడ్డికి సి.పి.ఐ. రాష్ట్ర సమితి కార్యదర్శి డా|| కె.నారాయణ విజ్ఞప్తి చేశారు. ఈ మేరకు గురువారం ముఖ్యమంత్రికి ఒక లేఖ రాశారు. ఆ లేఖ యిలా వున్నది. సమాచార హక్కు చట్టం ఏర్పడి 6 సంవత్సరాలు పూర్తయి నప్పటికీ నిజాయితీగా చెప్పుకోవాలంటే అది సంతృప్తికర స్థాయిలో లేదా ఆశించదగ్గ రీతిలో అమలుకు నోచుకోలే దన్నది మీకూ తెలిసిన విషయమే ! చట్టపు ఆచరణకు సంబంధించిన బలమంతా తగినంత మంది యోగ్యులైన కమిషనర్ల నియామకంపైనే అధారపడి ఉంటుందన్నారు. ఏ కారణాల వల్లనైతేనేమి గతంలో ఒక ప్రధాన కమి షనరు, ముగ్గురు కమిషనర్ల నియామకం మాత్రమే జరిగిందన్నారు. ఈ 6 సంవత్సరాల అనుభవం చెబు తున్న దాన్ని బట్టి సమాచార హక్కు చట్టం క్రింద సమా చారం కోరుతూ చేసుకున్న దరఖాస్తులను పరిష్కరించే పని పౌర సమాచార అధికారుల స్థాయిలో సక్రమంగా అమలు జరగలేదన్నారు. ఆ నేపధ్యంలో కమిషన్‌కు వచ్చిన అప్పీళ్ళ పరిష్కారం కూడా తగినంత మంది కమి షనర్లు లేకపోవటం వల్ల విపరీతమైన జాప్యం జరు గుతూ నెలలే గాక సంవత్సరాల తరబడి అపరిష్కృతం గానే పడి ఉంటోందని ఆందోళన వ్యక్తం చేశారు. ప్రజలు అంతగా చైతన్యవంతంగాని ఈ దశలోనే పరిస్థితి ఈ విధంగా ఉన్నది. ఒక పక్క ప్రభుత్వం మర్రి చెన్నారెడ్డి మానవ వనరుల అభివృద్ధి కేంద్రం ద్వారా, ఏ.ఎం.ఆర్‌ - అపార్డు ద్వారా ప్రభుత్వాధికారులకే గాక ప్రజలకూ అవగాహన కల్గించే కార్యక్రమాలు చేపట్టింది. ఈ రెండు సంస్థల యత్నాల వల్ల రాబోవు కాలంలో చైతన్యవంత మైన ప్రజలు సమాచార హక్కు చట్టాన్ని వినియోగించు కోవడానికి పూనుకుంటారు. ఆ పరిస్థితిలో వారు కోరిన సమాచారాన్ని అందించడానికి గానీ, సమాచారాన్ని సక్రమంగా అందిచని వారిపై చర్యలు తీసుకోవడానికి తగినంత మంది కమిషనర్లు, వారికి సహకరించే సిబ్బంది, అనువైన సామాగ్రి లేకుండా సాధ్యపడదు. కనుక పూర్తి స్థాయిలో కమిషనర్ల నియామకం తప్పని సరిగా చేయవలసి ఉందన్నారు. ఇది జరగకుంటే కమిష నర్ల ముందుకు వచ్చే ఆప్పీళ్లు పెండింగ్‌ కేసులు మాదిరే తయారయ్యే ప్రమాదముందన్నారు.
అంతేగాక కమిషనర్ల ఎంపిక విషయంలో సమాచార హక్కు చట్టం నిర్ధేశిస్తున్న మార్గదర్శకాలకు అనుగుణంగా అనుభవజ్ఞులైన వ్యక్తులను కమిషనర్లుగా నియమించక పోయినా, చట్టం ఆశిస్తున్న రీతిలో ప్రజలకు న్యాయం జరగదన్నారు. కనుక ఇప్పటికైనా వాస్తవ పరిస్థితులను దృష్టిలోపెట్టుకొని చట్టం అవకాశం కల్పి స్తున్న మేరకు ప్రధాన కమిషనర్‌కు తోడుగా 10 మంది కమిషనర్లను నియమించ వలసిందిగా కోరారు. ఇప్పటికే కర్నాటక, మహారాష్ట్ర, ఉత్తరప్రదేశ్‌, పంజాబ్‌, హర్యానా రాష్ట్రాలలో పదిమంది చొప్పును కమిషనర్ల నియామకం జరిగిన విషయాన్ని ఈ సందర్భంగా ప్రస్తావించారు. మన కంటే చిన్న రాష్రాలలో కూడా ఎక్కువ సంఖ్యలో కమిషనర్ల నియామకం జరిగి, సమాచార హక్కు చట్టం ఆదర్శప్రా యంగా అమలు జరుగుతున్నదన్నారు. ఈ దశలో పెద్ద రాష్ట్రమైన ఆంధ్రప్రదేశ్‌లో ఇంతవరకు కమిషనర్ల ఎంపిక జరగక పోవడం విచారకరమన్నారు. వెంటనే కమిషనర్ల ఎంపికతో పాటుగా కమిషన్‌లో తగినంత మంది సిబ్బందిని, సామాగ్రిని, వసతులను సమకూర్చవలసిం దిగా కోరారు. సమాచార హక్కు చట్టం సెక్షన్‌ 26 లో చూపించిన విధంగా వీలైనంత ఎక్కువగా దాన్ని గురించి చేయవలసిన ప్రచారానికి వీలైనంత ఎక్కువగా నిధులను సమకూర్చాలని కోరారు.
సమాచారం అందక ఇబ్బంది పడుతున్న పేద ప్రజలు రెండవ అప్పీలు విషయంలో రాష్ట్ర రాజధానికి రావలసి రావడం పెను భారంగా మారిందన్నారు. అందుచేత రెండు లేక మూడు జిల్లాలకు ఒక కమిషనర్‌ చొప్పున ప్రాంతీయ కమిషనరేట్లను కూడా ఏర్పాటు చేసి చట్టం ప్రధానంగా ఉద్ధేశిస్తున్న పేద ప్రజలకు న్యాయం చేకూర్చవలసింనదిగా కూడా ముఖ్యమంత్రి కిరణ్‌కుమార్‌కు నారాయణ విజ్ఞప్తి చేశారు.

ప్రతి కార్మికునికీ

ప్రతి కార్మికునికీ రూ.10 వేల జీతం ఇవ్వాలి

Thu, 24 Mar 2011, IST    vv Share  Buzz up!

కార్మిక సంఘాల ఐక్య ధర్నా

హైదరాబాద్‌ (వి.వి.) : రాష్ట్రంలో ప్రతి కార్మికునికి కనీస వేతనం రూ.10 వేలకు పెంచి, కేంద్ర, రాష్ట్ర ప్రభుత్వ విభాగాల్లో పని చేస్తున్న 5 లక్షలపైగా ఉన్న కాంట్రాక్టు, అవుట్‌సోర్సింగ్‌ కార్మికులను వెంటనే క్రమబద్ధీకరించే వరకు ఐక్య ఉద్యమాలను కొనసాగిస్తామని పలు కార్మిక సంఘాల నేతలు ప్రభుత్వాన్ని హెచ్చరించారు. కార్మికుల న్యాయమైన కోరికలను వెంటనే పరిష్కరించాలని డిమాండ్‌ చేస్తూ పలు కార్మిక సంఘాల ఆధ్వర్యంలో గురువారం ఇందిరాపార్కు వద్ద మహాధర్నా జరిగింది. ఈ ధర్నాకు ముఖ్యఅతిథిగా ఎఐటియుసి రాష్ట్ర ప్రధాన కార్యదర్శి, నూతనంగా ఎన్నికైన ఎమ్మెల్సీ పి.జె చంద్రశేఖరరావు హాజరుకాగా, ఎఐటియుసి కార్యదర్శి నరసింహన్‌, సిఐటియు రాష్ట్ర ప్రధాన కార్యదర్శి సుధాభాస్కర్‌, టిఎన్‌టియుసి రాష్ట్ర ప్రధాన కార్యదర్శి జి.రాంబాబు, ఐఎఫ్‌టియు నాయకులు ఎస్‌.వెంకటే శ్వరరావు, హెచ్‌ఎంఎస్‌ రాష్ట్ర అధ్యక్షులు నాయిని నర్సింహారెడ్డి, నాయకులు ఆర్‌.రాంబాబు, ఎఐయుటియుసి నాయకులు సుధీర్‌, సిసిఇడబ్య్లూడబ్య్లూ నాయకులు వి.నాగేశ్వరరావు, ఎఐడిడిఇఎఫ్‌ నాయకులు చంద్రయ్యలు ప్రసంగించారు. ఈ కార్యక్రమానికి కార్మిక సంఘాల నాయకులు మహమ్మద్‌ యూసుఫ్‌ (ఎఐటియుసి), జె.వెంకటేశ్‌ (సిఐటియు), వెంకటేశ్‌ (హెచ్‌ఎంఎస్‌), ఎస్‌.ఎల్‌.పద్మ (ఐఎఫ్‌టియు), అశోక్‌ (టిఎన్‌టియుసి) అధ్యక్షవర్గంగా వ్యవహరించారు.
ఈ సందర్భంగా పి.జె.చంద్రశేఖరరావు మాట్లాడుతూ కాంట్రాక్టు కార్మికుల సర్వీసులను క్రమబద్ధీకరించాలని, శాశ్వత స్వభావం గల పనులలో శాశ్వత ఉపాధి కల్పించాలని డిమాండ్‌ చేశారు. కాంట్రాక్టర్లు మారినాఅప్పటికే అక్కడ పని చేస్తున్న కార్మికులను తొలగించడమో, మార్చడమో చేయరాద న్నారు. రాష్ట్రంలో సంపద సృష్టిస్తున్న కార్మికులకు పెరిగిన ధరలకు అనుగు ణంగా కనీస వేతనం 10 వేలకు పెంచాలని గత రెండేళ్లుగా ఉద్యమాలు చేస్తుంటే ప్రభుత్వం స్పందించకపోవడం సిగ్గుచేటన్నారు. ఎన్నో ఏళ్ళుగా అపరిష్కృతంగా ఉన్న కార్మికుల సమస్యలను తక్షణమే పరిష్కరించాలని కోరారు.
నరసింహన్‌ మాట్లాడుతూ ఎమ్మెల్యేలకు ఇప్పటికే రూ.40 వేల వరకువున్న వేతనాలను రెట్టింపు చేయాలని అడిగిన వెంటనే జరుగుతున్న శాసనసభ సమావేశాల్లో అమలు చేయడానికి సిద్ధమైన ముఖ్యమంత్రికి కార్మికులకు కనీస వేతనం అమలు చేయాలన్న ఇంగిత జ్ఞానం కూడా లేదని ధ్వజమెత్తారు. కార్మికులకు ఇచ్చే నాలుగు, ఐదు వేల రూపాయలు జీతం ఈ మంత్రులు, ఎమ్మెల్యేలకు ఇస్తే ఇంట్లో వారికి తిండి పెడతారో, లేక వాత పెడతారో తెలుస్తుందన్నారు. సుధాభాస్కర్‌ మాట్లాడుతూ కనీస వేతనానికి సంబంధించి జీవో విడుదల చేసినా అమలు చేయడం లేదని విమర్శించారు. అమలు అయ్యేలా ముఖ్యమంత్రిచర్యలు తీసుకోవాలని డిమాండ్‌ చేశారు. జి.రాంబాబు మాట్లాడుతూ, కనీస వేతన జీవో విడుదల కోసం పోరు తప్పడం లేదని, మరోవైపు వచ్చిన జీవో అమలుకు కూడా ఉద్యమిస్తే తప్ప ప్రభుత్వం స్పందించకపోవడం సిగ్గుచేెటన్నారు. ఎస్‌.వెంకటేశ్వరరావు మాట్లాడుతూ, సమానపనికి సమాన వేతనం చెల్లించాలని జీవో నెం.6 క్లాజ్‌ (7)ను విధిగా అమలు చేయాలని ఆయన ప్రభుత్వాన్ని కోరారు. ఆర్‌.రాంబాబు, సుధీర్‌లు మాట్లాడుతూ, కార్మికుల చట్టం ప్రకారం పర్మినెంట్‌, కాంట్రాక్ట్‌ కార్మికులన్న తేడా లేకుండా సంవత్సరంలో 30 రోజులు పని చేస్తే బోనస్‌ ఇవ్వాలని ఉన్నా, కార్మికులకు మాత్రం ఏళ్ళకు ఏళ్ళుగా పనిచేస్తున్నా బోనస్‌ ఇవ్వడం లేదన్నారు. వి.నాగేశ్వరరావు, చంద్రయ్య మాట్లాడుతూ 1957వ సంవత్సరంలో జరిగిన ఇండియన్‌ లేబర్‌ కాన్ఫ్‌రెన్స్‌ సూచనల మేరకు కనీస వేతనం అమలు చేయాలని వారు డిమాండ్‌ చేశారు. అంతేకాకుండా ప్రతి కార్మికునికి పిఎఫ్‌, ఇఎస్‌ఐ, బోనస్‌ తదితర కనీస సౌకర్యాలు కల్పించాలని వారు ప్రభుత్వానికి విజ్ఞప్తి చేశారు.

పునరావాసం,

పునరావాసం, పునర్నిర్మాణం పేరుతో పేదలను దూరం చేయొద్దు

Wed, 23 Mar 2011, IST    v Share  Buzz up!

కె.శ్రీనివాస్‌రెడ్డి

హైదరాబాద్‌, (వి.వి.) : ప్రభుత్వం ఎటువంటి ప్రత్యామ్నాయం చూపించకుండా, పునరావసం కల్పించకుండా నిరుపేదలు నివసించే మురికివాడలను నగరానికి దూరంగా తరలించడం నేరమవుతుందని ఇండియన్‌ జర్నలిస్ట్స్‌ యూనియన్‌ (ఐజెయు) సెక్రటరీ జనరల్‌ కె.శ్రీనివాస్‌రెడ్డి అన్నారు. ప్రజల్లో లోతైన చర్చ జరగకుండా కేంద్రప్రభుత్వం మురికివాడల పునరాభివృద్ధి, పునరావాసం, నివారణాచట్టం- 2010 (మెప్మా) పేరుతో రూపొందించిన ముసాయిదాబిల్లును రాష్ట్రప్రభుత్వం చట్టంగా తీసుకువస్తే అది పేదప్రజల నివాసహక్కుకు తీరని నష్టాన్ని చేకూరుస్తుందన్నారు. బుధవారం నగరంలోని బషీర్‌బాగ్‌ ప్రెస్‌క్లబ్‌లో 'అందరికీ నివాసహక్కు' డిమాండ్‌పై, నివాస హక్కుల పరిరక్షణ ప్రచారసమితి (ఛత్రి) ఆధ్వర్యంలో జరిగిన మీడియా ప్రతినిధుల ఇష్టాగోష్ఠి కార్యక్రమానికి ఆయన ముఖ్యఅతిథిగా హాజరై ప్రసంగించారు. కేంద్రప్రభుత్వం 'రాజీవ్‌ ఆవాస్‌ యోజన' అమలుకోసం రూపొందించిన మురికివాడల అభివృద్ధి, పునరావాసం, నివారణ చట్టం అనే పదాలు పేదలకు చెడుచేయకుండా ప్రభుత్వ ఉద్దేశ్యం యథావిధిగా అమలు చేస్తే అభ్యంతరం లేదన్నారు. ఈ చట్టంలోని లొసుగులు అధికారులకు, రాజకీయవేత్తలకు చాలా అందుబాటులో ఉండి వారికి లబ్ధిచేకూర్చేదిగా ఉంటే వ్యతిరేకించాల్సిన అవసరముందన్నారు.నగరాలు, పట్టణాల్లో భూమి బంగారం కంటే ఎక్కువగా పెరిగిపోతుందని, పేదలు నివాసమేర్పరచుకోవడానికి అనువుగా ఉన్న 95 శాతం ప్రభుత్వభూమిని ల్యాండ్‌మాఫియా, కొందరు రాజకీయవేత్తలు, బ్యూరోక్రసీ ఏకమై అక్రమించుకునేందుకు యత్నించడం శోచనీయమన్నారు. రాష్ట్ర ఆర్థిక శాఖామంత్రి మహీధర్‌ రెడ్డి రాష్ట్రంలో రాజీవ్‌ ఆవాస్‌ యోజన అమలుకు కేంద్రాన్ని రూ.68 వేల కోట్లనిధులు కోరితే, రూ. 6,500 కోట్లు కూడా కేటాయించలేదని తెలిపారు. 2014 నాటికి రాష్ట్రంలో ఎక్కడా కూడా మురికివాడలు లేకుండా చేస్తామన్న ప్రభుత్వఆకాంక్ష సరైనదైనప్పటికీ, ఆచరణ కష్టసాధ్యమేనన్నారు. రాష్ట్ర ప్రభుత్వం ముసాయిదాబిల్లుకు సంబంధించి ఆర్డినెన్స్‌కు ప్రయత్నించే అవకాశం కూడా ఉందన్నారు.మానవ హక్కుల వేదిక అధ్యక్షులు జీవన్‌కుమార్‌ ప్రసంగిస్తూ ప్రపంచ వ్యాప్తంగా గ్లోబల్‌ సిటీ కాన్సెప్ట్‌ వస్తుందని అందుకు షాంఘై నగరాన్ని ఉదహరించారు. నగరాలు చాలా అందంగా ఉండాలన్న పేరుతో పాలకులు పేదలను నగరాలనుంచి వెళ్ళగొట్టే ఆలోచన చేయడం ఆక్షేపణీయమన్నారు. మురికివాడలను, ప్రభుత్వం ప్రజల భాగస్వామ్యం (పిపిపి) పేరుతో అభివృద్ధి చేయాలని చూస్తోందన్నారు. పిపిపి చాలా ప్రమాదకరమైనదని పేర్కొన్నారు. పాలకులు రాజకీయలబ్ది కోసమే ఎన్నికలప్పుడు పథకాలను రూపొందిస్తున్నారని, ప్రజలకు జీవించే హక్కు ఉన్నప్పటికీ నివాసహక్కు కల్పించకపోవడం విచారకరమన్నారు. ఛత్రి కన్వీనర్‌ బ్రదర్‌ వర్ఘీస్‌ తెక్నాథ్‌ మాట్లాడుతూ పేదప్రజలకు నివాసహక్కు దక్కే విషయంలో మీడియా క్రియాశీలక పాత్ర పోషించాలని కోరారు. పేదరికం నిర్మూలన కోసం ప్రభుత్వాలు వేల కోట్లు ఖర్చు చేస్తున్నా నేటికీ అట్టడుగువర్గాల ప్రజలకు ఉచితంగా ఇళ్ళు నిర్మించి ఇవ్వలేకపోవడం విచారకరమన్నారు. పేదలకు నివాసహక్కు కల్పించడం ప్రభుత్వ బాధ్యతగా పేర్కొన్నారు. ఛత్రి కో- ఆర్డినేటర్‌ జె.రమణారావు అధ్యక్షతన జరిగిన ఈ ఇష్టాగోష్ఠి కార్యక్రమంలో పలువురు మీడియా ప్రతినిధులు అడిగిన ప్రశ్నలు, సందేహాలకు ఛత్రి కన్వీనర్‌ వర్ఘీస్‌ సమాధానాలిచ్చారు.